पीपर के छंइआ में जे संइआ जी बोलएलन,
मीले नs अएलन हो, मीले नs अएलन।
पीपर के......।
डंहुरी पर कोयल जे कुहू-कुहू बोले,
मनबा हमर संङ-संङ ओकरे डोले,
कोनो पेहानी नs मन रमकएलन,
मीले नs अएलन हो, मीले नs अएलन।
पीपर के......।
रग्गर पर लग्गल पुरबइआ अभगली,
खुशबू पिआ के आएल हम समझली,
छन में हजार बेर मन हमर मुसकएलन,
मीले नs अएलन हो, मीले नs अएलन।
पीपर के......।
रस्ते में होतन साइत सनेसे में बझ्झल,
अनारी अनाठू न जाने कोनो भग्गल,
मन तरसएलन आ अँखिआ गरएलन,
मीले नs अएलन हो, मीले नs अएलन।
पीपर के......।
भे गेल अबेर लोग संसय से देखे,
कारन बेकारन उलंङ जाल फेकें,
हम्मर बदनामी बेकारे करएलन,
मीले नs अएलन हो, मीले नs अएलन।
पीपर के......।
पुछबन बिहान जब मीले ले अएतन,
मानबन न बात कहां सांस लेबे जएतन,
आस बिसबास के डोरी थमएलन,
मीले नs अएलन हो, मीले नs अएलन।
पीपर के......।
— ई. राणा ब्रजेश
दरभंगा , बिहार
